Markaðsleyfishafi lyfsins (AstraZeneca AB) hefur í samráði við Lyfjastofnun Evrópu og Lyfjastofnun sent bréf til heilbrigðisstarfsmanna til að upplýsa um tengsl milli bóluefnisins og tilvika segamyndunar samhliða blóðflagnafæð.
Samantekt bréfsins er svohljóðandi:
- Orsakasamhengi milli bólusetningar með COVID-19 Vaccine AstraZeneca (Vaxzevria) og tilvika segamyndunar samhliða blóðflagnafæð er talið líklegt.
- Jafnvel þótt slíkar aukaverkanir komi örsjaldan fyrir þá er tíðni þeirra hærri en búast má við í almennu þýði.
- Á þessu stigi málsins hafa ekki verið greindir neinir sérstakir áhættuþættir.
- Heilbrigðisstarfsmenn skulu vera vakandi fyrir teiknum og einkennum segareks og/eða blóðflagnafæðar og upplýsa þá sem bólusettir eru í samræmi við það.
- Notkun bóluefnisins á að vera í samræmi við opinberar ráðleggingar heilbrigðisyfirvalda.
Nánari upplýsingar er að finna í bréfinu og að auki má finna ítarlegar upplýsingar um COVID-19 Vaccine AstraZeneca (Vaxzevria) í sérlyfjaskrá.
Tilkynning aukaverkana
Heilbrigðisstarfsmenn eru hvattir til að tilkynna allar aukaverkanir sem grunur er um að tengist COVID-19 Vaccine AstraZeneca (Vaxzevria) til Lyfjastofnunar.