Tilkynningum um aukaverkanir fækkaði til muna milli tveggja fyrstu mánaða þessa árs, enda var bólusetningum gegn COVID-19 þá að mestu lokið hjá flestum aldurshópum. Frá vordögum hefur fjöldi tilkynninga færst í horf sem er líkara því sem gerðist fyrir covid; þær hafa flesta þá mánuði verið á bilinu 20 til 30. Í lok september hófst bólusetningarátak þegar boðið var upp á fjórða bóluefnaskammtinn og í kjölfar þess fjölgaði aukaverkanatilkynningum frá fyrra mánuði. Fjölgunin var þó einungis lítilsháttar.
Tilkynningar í október - sundurliðun eftir bóluefnum
Í október bárust 27 tilkynningar vegna gruns um aukaverkun. Af þeim tengdust 12 bóluefnum gegn COVID-19; 10 vegna Comirnaty frá BioNTech/Pfizer, og 2 vegna bóluefnisins Jcovden frá Janssen. 15 tilkynninganna tengdust öðrum lyfjum.
Fjöldi tilkynninga í október eftir alvarleika
Tilkynningar vegna gruns um alvarlega aukaverkun voru 2. Önnur þeirra tengdist bóluefni gegn COVID-19, Comirnaty frá BioNTech/Pfizer. Hin tengdist öðru lyfi.
Fjöldi tilkynninga eftir tilkynnendum
Í október voru 15 tilkynninganna frá notendum eða aðstandendum þeirra, 5 frá læknum, 2 frá lyfjafræðingum, og 5 frá öðrum heilbrigðisstarfsmönnum.
Rétt er að taka fram að um tilkynningar vegna gruns um aukaverkun er að ræða. Það merkir að tilkynnt tilvik hafa átt sér stað í kjölfar lyfjanotkunar, en segir ekki til um hvort um orsakasamhengi sé að ræða milli tilvikanna og lyfjanotkunarinnar.
Fjölda aukaverkanatilkynninga ber alltaf að skoða í samhengi við notkun lyfs eða bóluefnis. Upplýsingar um fjölda bólusettra einstaklinga gegn COVID-19 er að finna á covid.is
Mikilvægt að tilkynna um aukaverkun lyfs
Enn skal ítrekað að aukaverkanatilkynningar veita mikilvægar upplýsingar um öryggi lyfja þegar þau eru komin í almenna notkun. Því er rétt að hvetja almenning jafnt sem heilbrigðisstarfsfólk til að senda upplýsingar um slík tilvik til Lyfjastofnunar.
Heilbrigðisstarfsmanni sem hefur grun um alvarlega, nýja eða óvænta aukaverkun af notkun lyfs í störfum sínum, er skylt að tilkynna það til Lyfjastofnunar. Þessi skylda er bundin í lög frá í ársbyrjun 2021, hana er að finna í 63. gr. lyfjalaga.
Allir geta tilkynnt grun um aukaverkun lyfs
Hægt er að tilkynna rafrænt í gegnum gátt á vef Lyfjastofnunar.
Í því sambandi má líka minna á að Lyfjastofnun Evrópu hefur hvatt sérstaklega til þess að aukaverkanir lyfja sem gefin hafa verið við COVID-19 sjúkdómnum, þar á meðal vegna bóluefna gegn COVID-19, verði tilkynntar, sem og aukaverkanir af lyfjanotkun vegna annarra sjúkdóma meðan á COVID-19 veikindum stendur.
.