Eins og kunnugt er var fjöldi aukaverkanatilkynninga sem barst Lyfjastofnun árið 2021 margfaldur á við það sem áður þekktist. Þar kom til hin víðtæka bólusetning gegn COVID-19 sem fram fór um allt land. Framan af því ári voru aukaverkanatilkynningar rúmlega 200 að meðaltali á mánuði, fjölgaði síðan verulega eftir að bólusetningarátakið hófst fyrir alvöru á vordögum í fyrra, en fór fækkandi með haustinu. Að meðaltali bárust 335 tilkynningar á mánuði árið 2021.
Fjöldi aukaverkanatilkynninga í janúar sl. var svipaður því sem var síðustu mánuði liðins árs, en í febrúar fækkaði tilkynningum verulega frá því sem verið hafði. Og tilkynningar í mars eru enn færri en í febrúar; lætur nærri að fjöldi aukaverkanatilkynninga sé kominn nokkuð nálægt því sem var fyrir heimsfaraldur COVID-19.
Tilkynningar í mars - sundurliðun eftir bóluefnum
Í mars bárust 30 tilkynningar vegna gruns um aukaverkun. Af þeim tengdust 15 bóluefnum gegn COVID-19; 12 vegna Comirnaty frá BioNTech/Pfizer, 2 vegna Spikevax frá Moderna, engar vegna bóluefnis Janssen, 1 vegna Vaxzevria frá AstraZeneca. Rétt er að geta þess að samkvæmt upplýsingum á covid.is, hafa engir skammtar verið gefnir af bóluefni AZ á þessu ári. Því er um tilkynningu vegna bólusetningar á síðasta ári að ræða. -Fimmtán tilkynninganna tengdust öðrum lyfjum.
Fjöldi tilkynninga í mars eftir alvarleika
Tilkynningar vegna gruns um alvarlega aukaverkun voru 9. Þrjár þeirra tengdust bóluefnum gegn Covid-19; 2 vegna Comirnaty frá BioNTech/Pfizer, engin vegna Vaxzevria frá AstraZeneca, 1 vegna Spikevax frá Moderna, engin vegna bóluefnis Janssen. -Sex tengdust öðrum lyfjum.
Fjöldi tilkynninga eftir tilkynnendum
Í mars voru 14 tilkynninganna frá notendum eða aðstandendum þeirra, 9 frá læknum, 6 frá lyfjafræðingum og 1 frá öðrum heilbrigðisstarfsmanni.
Rétt er að taka fram að um tilkynningar vegna gruns um aukaverkun er að ræða. Það merkir að tilkynnt tilvik hafa átt sér stað í kjölfar lyfjanotkunar, en segir ekki til um hvort um orsakasamhengi er að ræða milli tilvikanna og lyfjanotkunarinnar. Einnig ber að skoða fjölda tilkynninga í samhengi við fjölda bólusettra einstaklinga með einstaka bóluefni. Þær upplýsingar er að finna á covid.is
Mikilvægt að tilkynna um aukaverkun lyfs
Enn skal ítrekað að aukaverkanatilkynningar veita mikilvægar upplýsingar um öryggi lyfja þegar þau eru komin í almenna notkun. Því er rétt að hvetja almenning jafnt sem heilbrigðisstarfsfólk til að senda upplýsingar um slík tilvik til Lyfjastofnunar.
Heilbrigðisstarfsmanni sem hefur grun um alvarlega, nýja eða óvænta aukaverkun af notkun lyfs í störfum sínum, er skylt að tilkynna það til Lyfjastofnunar. Þessi skylda er bundin í lög frá í ársbyrjun 2021 og er að finna í 63. gr. lyfjalaga.
Allir geta tilkynnt grun um aukaverkun lyfs
Hægt er að tilkynna rafrænt í gegnum gátt á vef Lyfjastofnunar.
Í því sambandi má líka minna á að Lyfjastofnun Evrópu hefur hvatt sérstaklega til þess að aukaverkanir lyfja sem gefin hafa verið við COVID-19 sjúkdómnum, þar á meðal vegna bóluefna gegn COVID-19, verði tilkynntar, sem og aukaverkanir af lyfjanotkun vegna annarra sjúkdóma meðan á COVID-19 veikindum stendur.